Лондон полицияси 8 март куни Фаластин байроғи билан Биг-Бенга чиқиб олган ва у ерда 16 соат ўтирган британиялик 29 ёшли йигитга нисбатан айблов эълон қилди. Бу ҳақда Би-би-си хабар қилди.
Маълумотларга кўра, Эссекс графлигидаги Уэстклифф-он-Си шаҳрида яшовчи Дэниель Дэй жамоат тартибини бузганликда айбланмоқда.
У Вестминстер саройининг Елизавета минорасига шанба куни эрталаб чиқиб олган. Мазкур соатли минора Биг-Бен номи билан машҳур.
The Independent нашрининг ёзишича, қутқарувчилар Дэниель Дэй билан ўт ўчирувчиларнинг кўтарма кранидан туриб музокара олиб боришган ва фаолдан пастга тушишни илтимос қилишган, бироқ у фақат ўз шартлари асосида Биг-Бендан тушишини айтиб, уларнинг илтимосини рад этган. Дэй, агар унга яқинлашгудек бўлсалар, янада юқорироқ чиқиб кетиш билан таҳдид қилган.
Биг-Бенда ўтказилган 16 соат давомида фаол инстаграмдаги ўз саҳифаси орқали жонли ёйин олиб бориб, у ерда “полиция қатағони ва давлат зўравонлиги”га қарши норозилик билдираётгани айтган. Ўз ҳаракатининг норозилик акцияси эканини айтган Дэй Биг-Бенни Буюк Британиядаги “демократия маркази” деб атаган. Биг-Бендан 9 мартга ўтар кечаси тушишга рози бўлган фаол пастга тушиши билан қўлга олинган.
У юқорида бўлган пайтида Биг-Бен олдида бир гуруҳ одам тўпланиб, “Фаластинга озодлик” ва “Сен қаҳрамонсан” қабилидаги шиорларни ҳайқиришган.
10 март куни Вестминстер магистрат судида Дэниель Дэй маҳкамаси бўлиб ўтиши кутилмоқда.