Transparency International халқаро ташкилотининг жаҳон давлатларидаги коррупция даражаси бўйича бу йилги ҳисоботида Ўзбекистон 180 давлат орасида 121-ўринга қўйилган. Ўтган йили мамлакат мазкур рейтингнинг 126-поғонасида эди.
Ташкилот рейтингида коррупция даражаси 0 баллдан 100 баллгача бўлган миқдорда ўлчанади. Балл қанча юқори бўлса, мамлакатда коррупция даражаси шунча паст деганидир. Ўзбекистон бу йилги рейтингда 33 балл жамғарган, бу эса ўтган йилги кўрсаткичдан 2 баллга юқори.
Transparency International экспертлари қайдича, Ўзбекистон сингари жамғарган баллари 50 ка ҳам етмаган мамлакатларда коррупция билан боғлиқ жиддий муаммолар мавжуд. Уларга кўра, бу йил дунёдаги коррупциянинг ўртача кўрсаткичи 43 баллни ташкил этган. Ўзбекистон эришган натижа эса, гарчи кўрсаткичи ўтган йилдагидан 5 поғона юқори бўлса ҳам, жаҳондаги мазкур ўртача кўрсаткичдан ҳам 10 баллга пастдир.
Аввалроқ расмий Тошкент 2030 йилгача мамлакатни Transparency International томонидан эълон қилинадиган Коррупцияни қабул қилиш индексида камида 50 поғонага кўтаришга мақсадини очиқлаган эди. Бу “Ўзбекистон – 2030” стратегиясида белгиланган 5 та йўналиш бўйича қўйилган юзта мақсаддан бири экани айтилган.
Озодлик радиоси сўнгги йилларда Ўзбекистондаги коррупция кўламига оид қатор суриштирувларини эълон қилиб келмоқда. Дейлик, Озодлик ўтган йили ўз сайти ва Youtube каналида ёйинлаган “Мирзиёев кластерига айланаётган Ўзбекистон” суриштируви шу кунгача 6,7 миллион марта кўрилган. Бу ва бошқа суриштирувларда Ўзбекистондаги энг катта коррупциявий схемалар Мирзиёевлар оиласи томонидан амалга оширилаётгани айтилган. Ўзбекистон ҳукумати Озодликнинг бу суриштирувлари юзасидан расмий муносабат билдирган эмас.
Transparency International’нинг бу йилги рейтингида Ўзбекистонга қўшни бўлган Қозоғистон 39 балл билан 93-ўринни, Қирғизистон 26 балл билан 141-ўринни, Тожикистон 20 балл билан 162-ўринни, Туркманистон 18 балл билан 170-ўринни эгаллаган.