Озод Европа/Озодлик радиоси AҚШ Глобал Медиа агентлиги (USAGM) ҳамда унинг раҳбарлари Кэри Лейк ва Виктор Моралесга қарши AҚШ Конгресси томонидан тасдиқланган ва ташкилот фаолиятини молиялаштирадиган грантни бекор қилишга уриниш ҳаракати устидан судга даъво аризаси киритди.
Шикоятда Озод Европа/Озодлик радиоси учун АҚШ Конгресси томонидан ажратилган маблағнинг рад этилиши федерал қонунлар, шу жумладан AҚШ Конституциясига зид экани, чунки Конституция Конгрессга федерал харажатлар билан боғлиқ махсус ваколатларни бергани қайд этилган. Даъво AҚШнинг Колумбия округи туман судида кўриб чиқилади.
"Ҳозирда Aмерика душманларининг тарғиботи ва цензурасига ён бериладиган вақт эмас. Қонун биз томонда, деб ҳисоблаймиз ва дунё бўйлаб мустабидлар бизни тугатилади, деб нишонлашга шошилмоқда”. Стивен Капус, Озод Европа/Озодлик радиоси президенти
Озод Европа/Озодлик радиоси Президенти ва ижрочи директори Стивен Капус.
АҚШ президенти Доналд Трамп 7 та федерал агентлик, жумладан Озод Европа/Озодлик радиоси, Америка Овози ва бошқа бир қанча оммавий ахборот воситаларини бошқарувчи АҚШнинг Глобал Медиа агентлиги (USAGM) фаолиятини қисқартириш тўғрисидаги фармонни имзолаганди.
Ҳужжатда 7 кун ичида ҳар бир агентлик раҳбари Президент бюджет бошқармасига Трамп фармонига мувофиқлигини тасдиқловчи ҳисобот тақдим этиши ва агентликнинг қайси таркибий қисмлари ёки функциялари “қонун билан мажбурий ва қай даражада” эканлигини тушунтириб бериши талаб қилинди.
Фармон чиққанидан бир неча соат ўтиб, ABC News телеканалининг собиқ мухбири, журналист Тара Палмери Озодлик радиоси учун Конгресс томонидан маъқулланган грант маблағлари тўхтатилгани ҳақидаги USAGM мактубини эълон қилди.
Мактуб Кэри Лейк томонидан имзоланган бўлиб, у ўзини (USAGM) бош директор вазифасини бажарувчисининг етакчи маслаҳатчиси сифатида таништирди.
Лейк, Трамп томонидан "Америка Овози" раҳбари лавозимига номзод қилиб кўрсатилган, аммо унинг тайинланиши Телерадиоэшиттиришлар бўйича халқаро маслаҳат кенгаши томонидан маъқулланиши керак.
Озод Европа/Озодлик радиоси Президенти ва Бош ижрочи директори Стивен Капус грант битимининг бекор қилиниши "Америка душманларига катта совға" бўлишини айтган.
"Озодлик радиосининг грант шартномасини бекор қилиш Америка душманлари учун катта совға бўлади. Эроннинг оятуллоҳлари, Хитойнинг коммунистик раҳбарлари, Москва ва Минскдаги автократлар Озодлик радиосининг 75 йиллик фаолиятидан сўнг ёпилганини нишонлайдилар. Бу уларни кучли, Американи эса кучсиз қилади", деди Капус ўз баёнотида.
Мавзуга алоқадор ЕИ Ташқи ишлар вазирлари Озод Европа/Озодлик Радиоси атрофидаги вазиятни муҳокама қилмоқдаОзодлик радиоси тарихи давомида ташкилот АҚШнинг иккала йирик сиёсий партияси томонидан ҳам кенг қўллаб-қувватлаб келинган.
Бу медиа корпорация хабарларини ҳозирга келиб дунёнинг ёпиқ жамиятларида Интернет телевидение ва ижтимоий платформаларда кунига 50 миллиондан ортиқ одам кўради.
Озод Европа/Озодлик радиоси – 1953 йилдан бери фаолият юритаётган мустақил медиа корпорациядир. Унинг фаолияти AҚШ Конгресси томонидан ажратилган грантлар ҳисобига молиялаштирилади, бу грантлар эса Глобал Медиа Aгентлиги орқали тақдим этилади.
Бу грантнинг бекор қилиниши ҳақида эълон қилингандан сўнг, бир неча Европа Иттифоқи давлати расмийлари медиа корпорацияни тўлиқ ёки қисман молиялаштириш орқали қўллаб-қувватлашни таклиф қилмоқда.
Чехия вакиллари ЕИдаги ҳамкасблари ўртасида баёнот лойиҳасини тарқатдилар.
Озодликда нусхаси мавжуд бўлган баёнотда Озод Европа/Озодлик Радиоси молиялаштирилиши билан боғлиқ вазият юзасидан жиддий ташвиш билдирилган.
Ҳужжатда таъкидланишича, ўн йиллар давомида "темир парда" ортидаги мамлакатлар аҳолисига объектив маълумот етказиб келган ушбу медиа-ташкилот "ҳозир ҳам эркин матбуот йўқ ёки чекловлар билан фаолият кўрсатаётган ҳудудларда ўн миллионлаб кишиларга ишончли, мустақил янгиликлар етказиб беришда давом этмоқда".
Брюсселда 17 март куни бўлиб ўтган йиғилишда Европа Иттифоқи мамлакатлари ташқи ишлар вазирлари йиғилишида Украинадаги уруш, Яқин Шарқдаги вазият ва бошқа масалалар билан бирга, Озод Европа/Озодлик Радиосининг вазияти ҳам муҳокама қилинди.
Браузерингиз HTML5 ни қўллаб- қувватламайди
Озодлик 72 ёшда: Мустамлака, "эски" ва "янги" Ўзбекистон солномаси. (1-қисм)
Саммитдан сўнг гапирган Чехия Ташқи ишлар вазири Ян Липавский Озод Европа/Озодлик Радиоси ва "Америка овози" фаолиятининг аҳамияти ҳақида гапириб, уларни авторитаризм шароитида яшовчи мамлакатлар аҳолиси учун "маёқ" деб атади.
"Бундай ташкилотда, бундай трансляцияларда, Россия, Беларус, Эрон ва бошқа кўплаб мамлакатларга нисбатан қандайдир қийматни кўряпмизми? Агар биз бундай қийматни кўрсак, бундай хизматни сақлаб қолиш учун нима қилишга тайёрмиз? Бу жуда кенг савол. АҚШ томонда воқеалар қандай ривожланишини билмаймиз ва қандай имкониятлар мавжудлигини ҳам билмаймиз. Шунинг учун, биз ўз кутишларимизни аниқ белгилашимиз керак, аммо биз сиёсий тайёргарликни бошлашимиз керак. Шундай қилиб, бугун нима қилиш кераклиги ҳақида сўрайман. Ва албатта, Чехия 25 йил давомида Прагада Озод Европа Радиосини қабул қилишдан жуда фахрланади", деб айтган Чехия Ташқи ишлар вазири.