Украина президенти Владимир Зеленский АҚШ президенти Доналд Трамп билан Оқ уйдаги даханаки жангга қарамай муносабатларни сақлаб қолиш мумкинлигига ишонишини айтди.
Жума куни Fox New телеканалига берган интервюсида Зеленский АҚШни ҳурмат қилишини таъкидлади.
Fox News бошловчиси Зеленскийдан: "Сизнингча, бугунги воқеадан кейин Доналд Трамп, Президент Трамп билан муносабатларингизни сақлаб қолиш мумкинми?", деб сўраганида у шундай жавоб берди:
"Ҳа, албатта. Чунки бу президентлар орасидаги муносабатдан кўра кўпроқ муносабатлардир. Халқимиз ўртасидаги тарихий муносабатлар, мустаҳкам муносабатлардир".
АҚШ Давлат котиби Марко Рубио Украина раҳбарини Оқ уйдаги учрашувни “фиаско”га айлантиргани учун кечирим сўрашга чақирди.
Рубио CNN телеканалида Зеленский "вақтимизни беҳуда олгани учун узр сўраши"ни айтди. Зеленский аввалроқ FOX News канали билан суҳбатда кечирим сўраш учун ҳеч нарсаси йўқлигини айтди.
Украина президенти Владимир Зеленский Оқ уйда АҚШ президенти Доналд Трамп билан музокаралар муваффақияцизликка учрагач, Лондонга учиб келди.
2 март куни Зеленский Буюк Британия бош вазири Кей Стармер томонидан Россиянинг Украинага қарши урушига бағишланган Европа етакчиларининг саммитида иштирок этишни режалаштирмоқда.
Бир кун аввал АҚШ президенти Дональд Трамп Украина президенти Владимир Зеленский билан даҳанаки жангдан сўнг "у Америка иштирок этадиган тинчликка тайёр эмас" дея баёнот берганди.
"Бугун Оқ уйда жуда муҳим учрашув бўлди. Биз ҳозиргидек босим ва таранглик шароитида ўзаро мулоқот қилмасдан туриб тушуниб бўлмайдиган кўп нарсаларни билиб олдик. Ҳис-туйғулар орқали қандай нарсалар намоён бўлишини кўриш ажабланарли. Мен шундай хулосага келдимки, агар тинчлик жараёнида Америка қатнашадиган бўлса, Президент Зеленский тинчликка тайёр эмас, Чунки у бизнинг иштирокимиз музокараларда унга катта устунлик беради, деб ўйлайди. Менга устунлик керак эмас, менга ТИНЧЛИК керак. У Қўшма Штатлар учун муқаддас бўлган Овал офисда АҚШга ҳурматсизлик кўрсатди. У қачон тинчликка тайёр бўлса, ўшанда қайтиб келиши мумкин", дейилади Трампнинг Truth ижтимоий тармоғида эълон қилинган баёнотда.
Браузерингиз HTML5 ни қўллаб- қувватламайди
Украинага босқин: 1096-кун | Трамп Зеленский ва Путинни ҳамкорликка чақирди
Овал кабинетдаги брифинг қизишган оҳанг билан тугади. Журналистлар олдида чиқиш қилиш чоғида Зеленскийнинг Киев оташкесимга тайёр эмаслиги ва Украина Вашингтондан хавфсизлик кафолатини олиши зарурлиги ҳақидаги баёнотидан кейин Украина ва АҚШ президентлари ўртасида тортишув бошланди.
“Бизга ўт очишни тўхтатишнинг ўзи кифоя эмас <...> Мен аввал Макрон ва Меркель иштирокида Путин билан шартнома имзолаганман. Қанақа дипломатия ҳақида гап кетяпти бу ерда?” - дея иқтибос келтирган Украина президенти сўзларидан “РБК-Украина” нашри.
Трамп Киев тинчлик битимини тузишда “муроса” қилиши лозимлиги, агар Украина расмийлари битимдан бош тортишса, Қўшма Штатлар бу ишда иштирок этмаслигини қўшимча қилди.
“Бизсиз сизнинг қўлингизда қарта йўқ, сиз биздан миннатдор бўлишингиз керак. Биз сизнинг мамлакатингизни қутқаришни ва урушни тўхтатишни истаяпмиз. Сиз: “Мен урушни тўхтатишни истамайман”, деёлмайсиз. Биз сизга 350 миллиард доллар бердик, аммо сиз ҳали ҳам миннатдор бўлмаяпсиз. Сизнинг бизга ҳеч қанақа буйруқ беришга ҳаққингиз йўқ. Сиз ҳозир унча устун позицияда эмассиз”, деди Трамп.
Мавзуга алоқадор Трамп, Украина, НАТО ва дипломатик ҳаракатлар ҳақида билиш керак бўлган 4 жиҳат
Трамп, Зеленский ва вице-президент Жей Ди Вэнс музокараларининг очиқ қисми якунида икки давлат лидерларининг матбуот анжумани бўлиб ўтиши керак эди. Аммо Оқ Уйдаги тортишувдан сўнг матбуот анжмумани бекор қилинди. Reuters агентлигининг хабар беришича, Зеленский Оқ Уйни шошилинч тарзда тарк этган.