Ўзбекистон хабарлари
Адлия вазирлиги активларни қайтаришда Г. Каримованинг умуман роли йўқлигини билдирди
Адлия вазирлиги аввалги президентнинг тўнғич қизи Гулнора Каримованинг хорижда музлатиб қўйилган активлардан бир қисмини Ўзбекистонга қайтаришига оид баёнот юзасидан изоҳ берди.
Вазирлик Ўзбекистонга мулкларни Г.Каримованинг ўзи қайтарганлиги ёки қолган мулклар бевосита Г.Каримова ёхуд бошқа алоҳида шахслар томонидан қайтарилиши мумкинлиги ҳақидаги таъкидлар ҳуқуқий асосга эга эмаслиги ва шу боис ҳақиқатга тўғри келмаслигини билдирган.
“Мазкур мулклар хорижий давлатларнинг ваколатли органлари томонидан ҳибсга олинганлиги муносабати билан улар анчадан буён Г.Каримова (унинг оила аъзолари)нинг тасарруфида эмас”, дейилади вазирлик хабарномасида.
Хабарномада Бош прокуратура ва Адлия вазирлиги томонидан Ўзбекистоннинг ваколатли идоралари иштирокида Г.Каримова томонидан жиноий йўл билан орттирилган 1,3 млрд. АҚШ долларидан ортиқ миқдордаги мулкларни қайтариш бўйича Швейцария, Франция, Россия Федерацияси ва бошқа давлатларнинг ваколатли органлари билан ҳамкорликда иш олиб борилаётгани урғуланган.
Эслатиб ўтамиз, жиноят ишлари бўйича Тошкент шаҳар судида 2020 йилнинг 18 март куни Г. Каримова ва у томонидан ташкил этилган жиноий уюшма аъзоларига нисбатан жиноят ишини кўриб чиқиш бўйича суд жараёни ниҳоясига етган ва суд ҳукми эълон қилинган.
Суд ҳукми билан 47 ёшли Гулнора Каримовага 13 йил 4 ой муддатга озодликдан маҳрум қилиш жазоси тайинланган. Жиноят қонунчилиги нормаларига мувофиқ ҳамда бир неча жиноят ва ҳукмлар мажмуи бўйича жазо тайинланганлигини инобатга олган ҳолда, жазо муддатини 2015 йил 21 августидан бошлаб ҳисоблаш белгиланган.
Кун янгиликлари
Ўзбекистон ва Грузия ўзаро савдо ҳажмини оширмоқчи
Ўзбекистон ва Грузия ўртасидаги товар айирбошлаш ҳажми мамлакатлар салоҳиятига мос эмас, деб таъкидланди Тошкентда 5 март куни бош вазирлар Абдулла Арипов ва Иракли Кобахидзе учрашувида.
Ўзбекистон бош вазири матбуот хизмати маълум қилишича, музокараларда икки давлат ўртасидаги Эркин савдо келишуви имкониятларини тўлиқ ишга солиб, яқин йилларда савдо ҳажмини 1 млрд долларга етказиш зарурлиги қайд этилган.
Бу натижага тўқимачилик, пойабзал ва чарм, электротехника, озиқ-овқат маҳсулотлари, рангли ва қора металлар, мева-сабзавот, кимё маҳсулотлари, қурилиш материаллари ва бошқа товарлар олди-сотдисига кенг йўл очиш орқали эришиш мумкинлиги билдирилган.
Тошкент ва Тбилиси асосий эътиборни уч йўналиш – савдо-иқтисодий алоқаларни янада ривожлантириш, инвестиция ва кооперация лойиҳалари кўламини кенгайтириш ҳамда транспорт-логистика тизимини яхшилашга қаратишга келишган.
Учрашувда, шунингдек, ҳудудлараро ҳамкорликни кучайтириш, жумладан, Самарқанд ва Батуми, Бухоро ва Мсхета шаҳарлари ўртасида тўғридан-тўғри ҳамкорликнинг йўлга қўйиш масаласи муҳокама этилган.
4-5 март кунлари расмий ташриф билан Ўзбекистонда бўлган Грузия бош вазири Иракли Кобахидзе президент Шавкат Мирзиёев, Олий Мажлис Сенати раиси Танзила Норбоева ҳамда Қонунчилик палатаси спикери Нуриддин Исмоилов билан ҳам учрашув ўтказган.
Мирзиёев билан мулоқотда ҳам товар айирбошлаш суръатини сақлаб қолиш, экспорт ва импорт мутаносиблигини таъминлаш, саноат кооперацияси лойиҳаларини илгари суриш муҳимлиги таъкидланган.
Ангрендаги кўмир конида "БелАЗ" ҳайдовчиси ҳалок бўлди
Тошкент вилоятидаги “Ангрен” кўмир конида инсоний талафотга олиб келган фожиа рўй берди.
“Ўзбеккўмир” АЖ матбуот хизмати хабарномасига кўра, 5 март куни соат 10:15 ларда “БелАЗ” русумли автоағдаргич тоғ жинсларини тўкиш вақтида орқага сирпаниб, ағдарилиб кетган ва алангаланиш рўй берган.
Ўт ўчирувчилари воқеа жойига тезлик билан етиб келиб ёнғинни тўлиқ ўчиришган. Ҳодиса оқибатида оғир жароҳатланган ҳайдовчи А.Аҳмеджонов шошилинч равишда шаҳар марказий шифохонасига етказилган. Аммо кўрсатилган тиббий ёрдамга қарамай, у шифохонада вафот этган.
Ҳодиса юзасидан ҳуқуқни муҳофаза қилиш идоралари томонидан суриштирув олиб борилаётгани билдирилган.
“Ўзбеккўмир” АЖ раҳбарияти марҳумнинг оила аъзоларига таъзия изҳор этган.
Озодлик аввал хабар берганидек, жорий йил январь ойида Самарқанд вилояти Пахтачи туманидаги “Қорақўтон” тоғ конидан ноқонуний равишда олтин рудасини қазиб олмоқчи бўлган икки фуқаро фожиали тарзда ҳалок бўлганди.
Ўтган йилнинг сентябрида Сурхондарё вилояти Бойсун туманидаги “Мустақилликнинг 25 йиллиги” газ конида рўй берган авария оқибатида Enter Engineering ширкати ишчилари ҳалок бўлгани маълум.
Метан "заправка"лар босқичма-босқич очилади - вазирлик
6 март куни соат 09:00 дан бошлаб Ўзбекистондаги автомобилларга газ тўлдириш компрессор шохобчалари (метан заправкалар) фаолияти босқичма-босқич йўлга қўйилади, деб маълум қилди Энергетика вазирлиги.
Вазирлик қайдича, март ойининг дастлабки кунларида мамлакатда ҳаво ҳарорати кескин тушиб, табиий газ истеъмоли ортиши ва қувурларда босимнинг пасайиши кузатилган. Мазкур ҳолатда биринчи навбатда аҳоли ҳамда ижтимоий соҳа объектларини табиий газ билан таъминлашга устуворлик қаратилган ва автомобилларга газ тўлдириш компрессор шохобчалари фаолияти вақтинчалик тўхтатилган.
“Ўтган кунлар мобайнида олиб борилган тезкор чора-тадбирлар натижасида қувурларда газ босими нормаллаштирилди. Бу эса метан заправкалар иш фаолиятини тиклаш имконини яратди”, дейилади расмий хабарномада.
Энергетика вазирлиги келтирилган ноқулайликлар учун истеъмолчилардан узр сўраган.
Ўзбекистонликлар бу йилги аёзни ҳам газ муаммоси, метан шохобчаларидаги узун навбатлар ва электр энергиясидаги узилишлар билан ўтказишди. Ҳукуматнинг бу йил қишда газ ва свет муаммоси бўлмайди, қабилидаги ваъдалари ваъдалигича қолди.
Маълумот ўрнида: 2024 йил 9 декабрдан истеъмол юқори бўлган ҳудудлардаги автомобилларга газ тўлдириш компрессор шохобчалари фаолиятига чеклов киритилганди.
Аввалроқ Энергетика вазирлиги мулозимининг энергобўҳронни оқлашга уриниши жамоатчиликнинг кескин танқидига сабаб бўлганди.
Маҳкумнинг уйини "ўзлаштирган" ҳоким муовини ишдан олинди
Тошкент вилояти Оҳангарон шаҳри ҳокимининг ёшлар сиёсати, ижтимоий ва маънавий-маърифий ишлар бўйича ўринбосари Зуфар Каримов ишдан бўшатилди.
Оҳангарон шаҳри ҳокими Музаффар Ражаббоевнинг 2025 йил 3 мартдаги қарорида Каримовнинг ишдан олинишига асос сифатида унинг аризаси ҳамда Меҳнат кодексининг 160-моддаси (ходимнинг ташаббусига кўра меҳнат шартномасини бекор қилиш) келтирилган.
2022 йил июль ойидан буён Оҳангарон ҳокими муовини вазифасида ишлаб келган Зуфар Каримов номи аввалроқ Kun.uz нашри суриштируви тилга олинган эди.
Суриштирувда қайд этилишича, 2007 йилда одам ўлдиришга суиқасд жиноятида айбланиб, 19 йилга озодликдан маҳрум қилинган Рустам Қурбоновга тегишли Оҳангарон шаҳридаги уйни таниши Зуфар Каримов суднинг ҳал қилув қарори билан ўз номига расмийлаштириб олган.
Фуқаролик ишлари бўйича Оҳангарон туманлараро судида кўрилган суд ишида квартира эгаси иштирок этмаган. Аммо суд ҳужжатларида аслида узоқ муддатга қамалган мулк эгаси “Россияга ишлаш учун кетди ва 4 йилдан бери ундан хабар бўлмади” деб расмийлаштирилган.
Суриштирувдан кейин Бош прокуратура ҳолат ўрганилаётгани ва вазиятга ҳуқуқий баҳо берилишини маълум қилган. Аммо ҳозирча текширув натижалари эълон қилинмаган.
Сўнгги вақтларда ҳоким ўринбосарларига нисбатан жиноят иши қўзғатилгани ҳақида бот-бот хабар берилаётганини кузатиш мумкин.
Озодлик жорий йил январь ойида Сирдарё вилояти Гулистон шаҳри ҳокимининг собиқ ўринбосари Қодир Додоев жуда кўп миқдорда фирибгарлик жиноятини содир қилганликда айбдор деб топилиб, 9 йилга қамалгани ҳақида хабар қилганди.
2024 йил ноябрь ойида эса Тошкент вилояти Чирчиқ шаҳри ҳокими ўринбосари 1 миллион доллар пора олган вақтида ушланган эди.
Temu Ўзбекистонда солиқ тўлашдан бош тортган- ИЛМА
Хитойнинг Temu платформаси маъмурияти Ўзбекистон солиқ идораларида рўйхатдан ўтиш ва юридик шахс сифатида фаолият юритишдан бош тортган. Бу ҳақда Истиқболли лойиҳалар миллий агентлигининг (ИЛМА) электрон тижорат бўлими бошлиғи Камронбек Муҳаммадиев Gazeta.uz нашрига интервьюсида маълум қилди.
“ИЛМА ҳам, Солиқ қўмитаси ҳам Temu билан расман боғланган. Мурожаатда улар солиқ органларида рўйхатдан ўтиш ёки юридик шахс очиш ниятлари йўқлиги, яъни ҳеч қандай солиқ тўлашни истамасликлари ҳақида расман жавоб берди. Компания халқаро платформа эканини, улар бу ерда ишламаслигини ва гўёки фойда келтирмаётганини айтди”, дейди Камронбек Муҳаммадиев.
ИЛМА мулозимига кўра, аслида катта савдо ҳажмига эга Temu ширкати нархларни тушириш ва агрессив маркетинг кампанияларида жуда фаол иштирок этмоқда.
Озодлик аввал хабар берганидек, Ўзбекистон Солиқ қўмитаси жорий йил 20 мартдан эътиборан Temu платформасидан фойдаланиш чекланишини маълум қилганди.
Қўмита матбуот хизматига кўра, платформа Ўзбекистон Республикасининг электрон тижорат, чакана савдо, реклама, шахсий маълумотларни ҳимоя қилиш, истеъмолчилар ҳуқуқларини ҳимоя қилиш, муаллифлик ҳуқуқи ва турдош ҳуқуқлар соҳасидаги қонун ҳужжатлари талабларига риоя этмаётгани аниқланган.
ИЛМА вакили Камронбек Муҳаммадиев Spot нашрига маълум қилишича, Temu ширкати сўнгги беш ой ичида Ўзбекистондан солиқ тўламаган ҳолда 50 миллион долларлик маблағни олиб чиққан.
Ўзбекистон олтин сотиб олиш бўйича яна биринчи бўлди
Жорий йил январь ойида Ўзбекистон жаҳон бўйича олтиннинг энг йирик харидори бўлди.
Бутунжаҳон олтин кенгаши (World Gold Council) таҳлилларига қараганда, Ўзбекистон Марказий банки 8 тонна соф олтин сотиб олган. Шу тариқа унинг олтин захираси салкам 391 тоннага етган. Бу умумий захираларнинг 82 фоизини ташкил этади.
Олтиннинг асосий харидорлари учлигидан Хитой (5 тонна) ҳамда Қозоғистон (4 тонна) ҳам ўрин олди.
Экспертларга кўра, марказий банкларнинг олтинга бўлган катта қизиқиши сақланиб қолмоқда. Геосиёсий хатарлар ортиши фонида ушбу стратегик маъданга бўлган талаб янада ортмоқда.
Ўзбекистон ўтган йилларда ҳам олтин сотиб олиш бўйича дунёда биринчи ўринни эгаллагани маълум.
40 га яқин мулозим уюшган жиноий гуруҳ аъзоси бўлган - ДХХ
Ўн етти нафар солиқ идоралари ходими, бир нафар божхоначи, бир нафар банкир, бир нафар туман ҳокимининг биринчи ўринбосари ва ўн саккиз нафар тадбиркорлик субъектларининг мансабдор шахсларидан иборат уюшган жиноий гуруҳ фаолияти фош этилди.
ДХХ матбуот хизмати маълум қилишича, 2020-2023 йиллар давомида 8 та сохта корхона ташкил қилган ушбу жиноий гуруҳ хорижга сохта экспорт қилинган мебель маҳсулотлари учун қайтарилиши белгиланган 15 фоиз қўшилган қиймат солиғининг (ҚҚС) салбий фарқ суммасини асоссиз қайтариб олиш орқали жами 24 млрд 580 млн сўм бюджет маблағларини талон-торож қилган.
Жиноий гуруҳ фаолиятини солиқ идораларининг собиқ ходими мувофиқлаштириб борган.
Ҳолат юзасидан Жиноят кодексининг 167, 179, 184, 209 ва 228-моддалари билан жиноят иши қўзғатилиб, тергов олиб борилган.
Тергов давомида 6 млрд 808 млн сўм давлат ҳисобига ундирилган. Шунингдек, етказилган зарарни қоплаш учун 6 млрд 300 млн сўмлик мол-мулк, жумладан, 1 та кўп қаватли хусусий тиббий клиника биноси, 1 та автомобиллар ювиш шохобчаси, 2 та хонадон, 6 та автомашина ҳамда телефон ва компьютер жиҳозлари хатланган.
Жиноят ишлари бўйича Мирзо Улуғбек туман суди томонидан 38 нафар судланувчининг 14 нафари 5 йил 6 ойдан 7 йил 6 ой муддатгача озодликдан маҳрум қилинган. Қолган судланувчиларга эса моддий зарарни қоплаш мажбурияти билан синов муддати, озодликни чеклаш каби жазолар тайинланган.
Аввалроқ маҳаллий блогерлар давлат солиқ инспекцияси бош инспектори дохил 30 кишилик бошқа бир жиноий гуруҳ ҚҚСни сохта схемалар орқали қайтариш йўли билан давлатга қарийб 168 млрд сўм зарар етказгани ҳақида хабар қилганди.
Ҳиндистон–Ўзбекистон транспорт йўлаги узайтирилди
“Ўзтeмирйўлконтeйнeр” АЖ томонидан Ҳиндистондан Қозоғистонга биринчи контeйнeр поезди ҳаракати амалга оширилди. Бу ҳақда “Ўзбекистон темир йўллари” АЖ матбуот хизмати маълум қилди.
12 та контейнердан иборат биринчи поезд Мундра (Ҳиндистон) портидан Сороковая (Қозоғистон) станциясига жўнаб кетган. Юклар Эрон, Туркманистон, Ўзбекистон ва Қозоғистон ҳудуди бўйлаб, денгиз (1585 км) ва темирйўл (4300 км) орқали манзилга етказилади.
Лойиҳа “Ўзтемирйўлконтейнер” АЖ, “TULM” ОАЖ (Туркманистон транспорт-логистика маркази) ва “Кедентранссервис” ОАЖ (Қозоғистон логистика терминаллари оператори) ҳамкорлигида амалга оширилмоқда.
Аввалроқ Ҳиндистон ва Ўзбекистон ўртасида (Мундра–Сирғали йўналишида) контейнер ташиш амалга оширилган эди. Янги қатнов Ҳиндистон–Ўзбекистон халқаро транспорт йўлаги Қозоғистонгача узайтирилганидан далолат беради.
“Ўзтемирйўлконтейнер” бошқаруви раиси Мирзиёд Мирҳамидов ҳам компания эндиликда Ҳиндистон–Марказий Осиё мультимодал йўлаги бўйлаб контейнер поездларини мунтазам жўнатишини билдирган.
Сўнгги вақтларда минтақа давлатлари темир йўл орқали юк ташиш имкониятларини оширишга ҳаракат қилмоқда.
Озодлик аввал хабар берганидек, 2024 йил 27 декабрь куни Хитой–Қирғизистон–Ўзбекистон темир йўли қурилишига старт берилди.
486 километрлик янги йўлак Евросиё қитъалараро кўпригининг жанубий тармоғига айланиши ва Жанубий-Шарқий, Ғарбий Осиё ҳамда Яқин Шарқ мамлакатлари, шу жумладан, Туркия, кейин эса Европа Иттифоқи бозорларига олиб чиқиши кутилмоқда.
Расмий Тошкентга кўра, жорий йилда Термиз–Мозори Шариф–Кобул–Пешовар трансафғон темир йўли қурилиши ҳам бошланади.
ИИВ ортидан Бош прокуратурада янги тайинловлар
Ўзбекистон президенти фармони билан Дилмурод Қосимов бош прокурор ўринбосари этиб тайинланди, деб маълум қилди БП матбуот хизмати.
Дилмурод Қосимов 2003-2017 йилларда прокуратура органларида турли лавозимларда ишлаган. 2017 йилдан буён эса президентнинг тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили (бизнес-омбудсман) лавозимида ишлаб келаётган эди.
2023 йил ноябрь ойидан буён Навоий вилояти прокурори вазифасида фаолият юритаётган Азамат Мирзаев эса Тошкент вилояти прокурорлигига ўтказилди. У 2023 йил августидан буён Тошкент вилояти прокуратурасини бошқарган Сирожиддин Эшқувватов ўрнини эгаллаган. Эшқувватовнинг кейинги тақдирига ойдинлик киритилмаган.
Озодлик 3 март куни Пўлат Бобожонов ички ишлар вазири лавозимидан бўшатилиб, унинг ўрнига Тошкент шаҳар ИИББ бошлиғи лавозимида хизмат қилиб келган Азиз Тошпўлатов тайинлангани ҳақида хабар берганди.
Бўшаб қолган пойтахт ИИББ бошлиғи курсисини 2023 йил август ойидан буён Хоразм вилояти ИИБ бошлиғи лавозимида ишлаб келаётган Равшан Султанхўжаев эгаллаган.
25 февраль куни Ботир Қудратхўжаев бош прокурор ўринбосари – ҳарбий прокурор лавозимидан озод этилиб, фавқулодда вазиятлар вазири лавозимига тайинланганди.
4 март куни президент қарори билан Қудратхўжаевга икки янги ўринбосар тайиланган.
Хуршид Сотиев эндиликда ФВВ ўринбосари – фавқулодда вазиятлар профилактикаси департаменти бошлиғи, Нуриддин Қодиров эса ФВВ ўринбосари – маънавий-маърифий ишлар ва кадрлар билан таъминлаш департаменти бошлиғи вазифасини бажаради.
Президент Мирзиёев 5 март куни коррупциянинг олдини олишга доир йиғилишда маълум қилишича, фавқулодда вазиятлар вазири ва унинг ўринбосарлари “қурилишга рухсат бериш, бинони топширишда ёнғин хавфсизлиги бўйича бюрократия ва қонун бузилиш кўпайиб кетгани” сабаб ишдан олинган.
Ўзбекистонда Temu платформаси чекланмоқда
Ўзбекистонда жорий йил 20 мартдан эътиборан Temu платформасидан фойдаланиш чекланади.
Солиқ қўмитаси матбуот хизмати қайдича, хорижий электрон савдо платформалари фаолиятини ўрганиш жараёнида айрим платформалар Ўзбекистон Республикасининг электрон тижорат, чакана савдо, реклама, шахсий маълумотларни ҳимоя қилиш, истеъмолчилар ҳуқуқларини ҳимоя қилиш, муаллифлик ҳуқуқи ва турдош ҳуқуқлар соҳасидаги қонун ҳужжатлари талабларига риоя этмаётгани аниқланган.
Қўмита, шунингдек, электрон тижорат операторлари, хусусан, электрон савдо платформалари операторлари сифатида фақат юридик шахслар – Ўзбекистон Республикаси резидентлари фаолият юритиши мумкинлигини эслатган.
“Тушунмовчиликларнинг олдини олиш мақсадида юртдошларимиздан бугунги кундан бошлаб Temu платформасида буюртма бермасликларини сўраймиз. Агар буюртма бундан олдин амалга оширилган бўлса, платформада тўловни қайтаришни ташкил этиш тавсия этилади”, дейилади Солиқ қўмитаси ҳамда Истиқболли лойиҳалар миллий агентлигининг қўшма хабарномасида.
Сўнгги вақтларда Temu интернет дўкони асосан Хитойда ишлаб чиқарилган арзон нархдаги моллари билан кўплаб ўзбекистонликларни жалб эта бошлагани айтилади.
Ижтимоий тармоқлардаги муҳокамаларда Amazon, AliExpress каби турдош электрон савдо платформаларига дахл этилмагани ҳолда фақат Тemu фаолияти чеклангани эътироз уйғотган.
Иқтисодчи Отабек Бакиров буни “ўта тор манфаатларга ишловчи субъектив, хато қарор”, “истеъмолчилар зиёнига ишлайдиган ҳаракат” деб баҳолаган.
Жамоат фаоли Расул Кушербоев эса Тemu Индонезия ва Вьетнамда ҳам блоклангани, Туркияда платформа маҳсулотларига 60 фоизлик бож жорий қилингани, маркетплейс фаолиятига чекловлар Европа Иттифоқи ва АҚШда ҳам муҳокама қилинаётгани ҳақида ёзган.
Ўзбек-қозоқ чегарасида қўшимча савдо йўлаклари очилади
Ўзбекистон ва Қозоғистон ўртадаги товар айирбошлаш ҳажмини ошириш мақсадида тўртта қўшимча савдо йўлаклари очилиши режалаштирилмоқда. Бу ҳақда Ўзбекистон ТИВнинг “Дунё” ахборот агентлиги хабар берди.
Ўзбекистоннинг Қозоғистондаги элчиси Бахтиёр Ибрагимов Жетису вилояти тадбиркорлари билан учрашувда мазкур ташаббус ҳақида гапирган.
Дипломатик миссия раҳбари расмий Тошкент давлат чегараларидаги назорат-ўтказиш пунктларини таъмирлаётгани ва бу ҳам товар айирбошлаш ҳажмининг ошишига хизмат қилишини айтган.
Тўртта қўшимча савдо йўлаклари айнан қайси ҳудудларда ташкил этилиши очиқланмаган.
Расмий статистикага кўра, 2024 йилда икки давлат ўртасидаги товар айирбошлаш ҳажми 4,2 миллиард доллардан ошган. Тошкент ва Остона бу кўрсаткични 10 миллиард долларга етказиш режасини эълон қилган.
Озодлик февраль ойи бошида ўзбек–қозоқ чегарасидаги “Довут ота” (“Тажен”) божхона маскани ҳамда “Ғишткўприк” божхона пости 3-4 ой муддатга ёпилгани ҳақида хабар қилган эди.
Қашқадарёдаги Қизилсув сув омбори "қуритилди"
Қашқадарё вилояти Яккабоғ туманидаги Қизилсув сув омбори тўсиқлари очилиши оқибатида сувга қўшилиб миллионлаб майда балиқлар оқиб чиққани ижтимоий тармоқларда муҳокамаларга сабаб бўлган.
ЎзА вазиятга ойдинлик киритишича, Қизилсув (халқ тилида Нўғайли) сув омбори тиклаш-таъмирлаш мақсадида қуритилган.
“Сув омбори 9 миллион метр куб сув ҳажмига эга, ҳозирги пайтда 5 миллион 800 метр куб фойдали ҳажми бор. Сувни очишимизга сабаб қурилгандан буён тиклаш-таъмирлаш ишлари бажарилмаган эди. Авария эшиги, санитар қувурларида таъмирлаш ишларини олиб бориш керак эди. Чунки уларнинг йиллар ўтиб емирилиши оқибатида сув сизиш ҳолатлари кузатилаётганди. Сувни тўлиқ қуритмасдан эса бу ишларни амалга ошириб бўлмайди. Шунинг учун хабарнома асосида сувни чиқарганмиз. Қизилсув сув омборидан чиққан сув Яккабоғ гидроузели орқали Чимқурғон сув омборига ташланган. Сув шунчаки оқизиб юборилгани йўқ”, деган Қизилсув сув омбори бошлиғи Тошкент Сиддиқов.
Қурилиши 1980 йилда бошланиб, 1991 йилда фойдаланишга топширилган ушбу гидроиншоот асосан Турнабулоқ дарёсидан тўйинади. Йиғилган сув Яккабоғ гидроузели орқали қишлоқ хўжалик экинларини суғоришга йўналтирилади.
Тошкент Сиддиқовнинг таъкидича, таъмирлаш ишлари сув энг кам келадиган маҳалда ўтказилмоқда ва тиклаш-таъмирлаш ишлари узоғи билан тўрт кунда тамомланади.
Иншоот вақтида таъмирланмаса келгусида фожиали ҳолатларга олиб келиши мумкинлигини айтган сув омбори бошлиғи миллионлаб балиқлар оқиб кетгани ҳақидаги хабарларга изоҳ бермаган.
Пора олган ИИБ терговчиси қамалди
Тошкент шаҳри ички ишлар тизими терговчиси пора сабаб жиноий жазога тортилди.
Kun.uz нашри суд ҳужжатига таяниб ёзишича, Бектемир тумани ИИО ФМБ терговчиси лавозимида ишлаб келган Н.Ҳ. 2024 йил 17 сентябрь куни иш юритувидаги жиноят иши бўйича айбланувчи тариқасида жалб этилган фуқародан қамоқ эҳтиёт чораси қўлламаслик эвазига 500 доллар олганда ушланган.
Собиқ терговчи судда пул миннатдорлик сифатида берилганини иддао қилиб, ўзига нисбатан оқлов ҳукми чиқарилишини сўраган.
“Гумонланувчига Жиноят кодексининг 276-моддаси 2-қисми билан айблов эълон қилиб, унга нисбатан гаров эҳтиёт чорасини танлаганлиги ҳақида қарордан бир нусха бердим. У ишини қонун доирасида тез кўриб берганим учун раҳмат сифатида 500 доллар бериб кетишини айтди”, деган у ўз кўрсатмасида.
Пулни хизмат хонасида олган терговчининг айби гувоҳларнинг кўрсатмалари, суд-кимёвий экспертиза хулосаси ва бошқа далиллар билан исботини топган, дейилади суд ҳужжатида.
Жиноят ишлари бўйича Мирзо Улуғбек туман судининг ҳукми билан Н.Ҳ. ЖКнинг 210-моддаси 1-қисмида назарда тутилган жиноятни содир этганликда айбдор деб топилган. Унга 3 йил ИИВ тизимида ишлаш ҳуқуқидан маҳрум қилинган ҳолда 2 йил муддатга озодликдан маҳрум қилиш жазоси тайинланган.
Кейинги йилларда ички ишлар тизими вакилларининг пора билан қўлга олингани ҳолатлари кўпайгани айтилади.
Ўтган йил октябрь ойида Cамарқанд вилояти Пахтачи тумани ИИБ Жиноят қидирув бўлими тезкор вакили порахўрлик сабаб жиноий жазога тортилган эди. Ўшанда ходим судда ўз айбига иқрорлик билдираркан, “муҳтож бўлгани”, “турмуш ўртоғи ва синглиси касал бўлиб қолгани” ва “кўп миқдорда жарималари борлиги” важидан пора олганини айтган.
Ўтган йилнинг октябрида, шунингдек, бангифурушга кўмаклашган ИИБ ходими 10 йил 2 ой муддатга озодликдан маҳрум қилинганди.
Ногиронлиги бор болаларга транспорт хизмати кўрсатилади
Ўзбекистонда 2025 йил якунига қадар ногиронлиги бўлган болалар ижтимоий соҳа объектлари, таълим муассасаларига бориб келишига қулайлик яратиш мақсадида ижтимоий транспорт хизмати йўлга қўйилади.
Вазирлар Маҳкамасининг “Транспорт хизматларидан фойдаланиш имкониятларини кенгайтириш орқали кўриш ва ҳаракатланиш билан боғлиқ касалликларга чалинган алоҳида таълим эҳтиёжлари бўлган болалар учун таълим олиш шароитларини яхшилаш тўғрисида”ги 132-сонли қарорида ана шундай вазифа белгиланган.
Ижтимоий ҳимоя миллий агентлиги матбуот хизмати маълум қилишича, ушбу хизматни 2025 йил 1 апрелдан Тошкент, Андижон ва Самарқанд шаҳарларида пилот лойиҳа сифатида, 2025 йилнинг якунига қадар эса республиканинг бошқа ҳудудларида босқичма-босқич жорий этилади.
Лойиҳа доирасида ихтисослаштирилган мактаб, мактаб-интернатлари, шу жумладан, ушбу муассасалардаги “Ғамхўрлик” гуруҳларида, умумтаълим мактабларининг инклюзив синфларида ҳамда реабилитация марказига эга давлат кўп тармоқли ихтисослаштирилган мактабгача таълим ташкилотларида таълим олувчи кўриш ва ҳаракатланиш билан боғлиқ касалликларга чалинган болаларга транспорт хизмати кўрсатилади.
Хизматдан фойдаланганлик учун тўлов ва субсидия тизими жорий этилади. Субсидия шаклидаги тўловлар агентликнинг Ижтимоий ҳимоя давлат жамғармаси маблағлари ҳисобидан амалга оширилади.
Озодлик аввалроқ “Ўзбекистоннинг кўринмас одамлари” – ногиронлиги бўлган шахслар дуч келаётган муаммоларга мутасаддилар эътиборини қаратганди.
Пўлат Бобожоновга янги лавозим берилди
Генерал-лейтенант Пўлат Бобожонов Ўзбекистон президентининг кадрлар сиёсати масалалари бўйича маслаҳатчисининг ўринбосари лавозимига тайинланди. Бу ҳақда ИИВ матбуот котиби маълум қилди.
3 март куни Пўлат Бобожонов ички ишлар вазири лавозимидан бўшатилиб, унинг ўрнига Тошкент шаҳар ИИББ бошлиғи лавозимида хизмат қилиб келган Азиз Тошпўлатов тайинлангани ортидан собиқ вазирнинг кейинги тақдири номаълум бўлиб қолаётган эди. Янги тайинлов Озодлик манбаларининг Бобожоновга президент администрациясидан иш берилиши ҳақидаги маълумотини тасдиқламоқда.
2017 йил сентябрдан буён ИИВга раҳбарлик қилиб келган Пўлат Бобожонов эндиликда президентнинг кадрлар сиёсати масалалари бўйича маслаҳатчиси Ғофуржон Мирзаевга ўринбосарлик қилади.
Ўтган йил ноябрида ички ишлар вазирлиги ва Тошкент шаҳри ИИББнинг қатор юқори лавозимли ва тезкор ходимлари ишдан бўшатилганди.
Озодлик манбалари бу истеъфолар президент администрацияси собиқ мулозими Комил Алламжоновга уюштирилган суиқасдга боғлиқ эканини айтишган.
Озодлик ихтиёрида Бобожоновнинг истеъфосини Алламжоновга суиқасд билан боғловчи маълумот йўқ, аммо ҳуқуқ-тартибот идораларидаги Озодлик манбалари буни айнан суиқасддан куч тизимларида бошланган “тозалаш”нинг давоми демоқда.
Уларнинг тахминича, бошқа куч тузилмалари, шунингдек, Олий судда ҳам ўзгаришлар бўлиши кутилмоқда.
Прокуратурадан чиққан ва Каримов бошқаруви даврида бир муддат Хоразм вилояти ҳокими лавозимида ишлаган 65 яшар Пўлат Бобожоновнинг ИИВга раҳбарлиги даврида тизим қийноқлар билан боғлиқ можаролар марказида бўлди.
Ҳуқуқ фаоллари ички ишлар тўғрисида узоқ кутилган қонун қабул қилинганидан кўп ўтмай вазир лавозимига тайинланган Бобожоновни қийноқлар билан боғлиқ вазиятни ўзгартира олмагани учун танқид қилишган.
ИИБдаги қатор шубҳали ўлим ҳодисалари ортидан Ўзбекистондаги жамоат фаоллари Бобожоновнинг истеъфосини ҳам талаб қилгани маълум. Вазирнинг ўзи бу каби чақириқлар ва фаолларнинг танқидларига расмий муносабат билдирмаган. У маҳаллий журналист ва блогерларнинг матбуот билан очиқ мулоқот қилиш ҳақидаги чақириқларини ҳам жавобсиз қолдирган.
