Президент Шавкат Мирзиёев 17 март куни АҚШ Конгресси аъзоси, Ўзбекистон билан ҳамкорлик бўйича парламент кокуси иштирокчиси Кэрол Миллер бошчилигидаги делегацияни қабул қилди.
Президент матбуот хизмати қайдича, учрашувда Тошкент билан Вашингтон ўртасидаги стратегик шериклик ва кўп қиррали ҳамкорлик муносабатларини янада ривожлантириш ва кенгайтириш масалалари кўриб чиқилган.
Кэрол Миллер Мирзиёевга АҚШ президенти, Конгресс раҳбарияти ва Ўзбекистон бўйича кокус аъзоларининг саломи ва энг эзгу тилакларини етказган.
“Икки томонлама ҳамкорликда юқори даражага эришилгани катта мамнуният билан қайд этилди. Фаол сиёсий мулоқотлар ва идоралараро алмашинувлар давом этмоқда. Кейинги йилларда товар айирбошлаш ва инвестициялар ҳажми бир неча баробар ортди, бизнес кооперацияси кучаймоқда”, дейилади расмий хабарномада.
Учрашувда иқтисодий ва инвестициявий лойиҳаларни, шу жумладан, тоғ-кон, саноат, энергетика, қишлоқ хўжалиги соҳаларидаги лойиҳаларни қўллаб-қувватлаш мақсадида парламентлараро ҳамкорликни кенгайтиришга алоҳида эътибор қаратилган.
Ўзбекистон ҳудудларининг Америка штатлари билан шериклик алоқаларини йўлга қўйиш муҳимлиги ҳам қайд этилган.
Аввалроқ расмий Тошкент Вашингтон билан стратегик шерикликни чуқурлаштириш режасини эълон қилган. Хусусан, 2025 йилга мўлжалланган давлат дастури лойиҳасида ташқи сиёсат маҳкамасига жорий йил якунига қадар Қўшма Штатлар янги маъмурияти вакиллари билан яқин ҳамкорлик ўрнатиш ва олий даражадаги ташрифни ташкил этиш вазифаси юкланган.
